د افغانستان اسلامی امارت

د سوداګرۍ او پانګونې خونه وايي، چې په تېرو ۱۰  میاشتو کې افغانستان بېلابېلو هېوادونو ته د ۵۱۸ میلیون ډالرو په ارزښت وچې میوې صادرې کړې دي. د یادې خونې د مسئولینو په وینا، د صادراتو ډېری برخه جلغوزي دي چې پر نورو هېوادونو سربېره، زیاته برخه یې چین ته صادره شوې ده.

دغه راز، د صنعت اوسوداګرۍ وزارت ویلي چې په تېر کال کې د ۱۲ میلیونه ډالرو په ارزښت د جلغوزیو د صادارتو حجم ۹۷۰ ټنو ته رسېدلی وو. د یاد وزارت مسئولین وایي چې د جلغوزیو ډېری صادرات د سیمې او کاونډ هېوادونو ته تر سره شوي دي.

د صنعت او سوداګرۍ وزارت ویاند عبد السلام جواد اخوندزاده وایي: په ۲۰۲۴ م کال کې د ۱۲ میلیونه ډالرو په ارزښت د جلغوزیو صادرات ۹۷۰ ټنه وو او د چین، پاکستان، هندوستان، سعودي عربستان، عربي متحده اماراتو، انګیستان او نورو هېوادونو ته صادر شوي دي.

د اقتصادي وزارت مسلکي مرستیال عبدالطیف نظري زیاتوي، د اسلامي امارت سیاست صادرات محوره دی. که اوسمهال واردات هم شتون لري د افغانستان د خلکو د اړتیا په اساس دی. د دې سیاست پر بنسټ، مونږ د وچې مېوې په برخه کې یوازې چین ته د څه باندې پنځه میلیون ډالره صادراتو پراختیا د بېلګې په توګه یادولی شو.